GEED IS MARIS
H.A. Ahmed Abdilahi Hussein
Maansadan Magaceedu Yahay GEED-IS MARIS waxa ay soo baxday 13/03/2013.
Waana maanso ka hadlaysa wacdiga iyo waayaha adduun.
Salaad waliba Goorteeda
 |
| H.A. Ahmed Abdillahi Hussein |
Gole waliba hawshiisa
Erey waliba goobtiisa
Galti baahan soo hoynta
Marti soor u gaynteedu
Gobta caadadeed weeye
Anigana xil ii gaara
Faral saaran guudkayga
Gayigeenu igu leeyay
Inaan gudo xaq igu weeye
Waxaan galabta suugaanta
Gabay iyo tix iyo maanso
Geeraarka marintiisa
Jiiftada gorfeynteeda
Laabta uga soo gooyay
Gorafka gu soo maalay
Ubaxlow u golo keenay
Inaan waajib gudo weeye
Bulshadayda gabigeedba
Godka inaan ka duwo weeye
Samahana guddoonsiiyo
Afartaasi waa guud mar
Arar iyo godkeed weeye
Iyo geedo sare waabka
Afar kale gorfeyn weeye
Anigiyo Garaadkayga.
Walee gaaniyow heedhe
Gabay dalabyo tuur yeesha
Waligay ma gola keeno
Galin maayo diiwaanka
Dhuunina ku gadan maayo
Qabyadana gufaynteeda
Garashaa I yeelsiisay
Erey kale haddaan goobo
Faalada u sii guuro
Gacal kaad ka dhiganayso
Eed garab ka filanayso
Waa Geed is maris Bahala
Gungumiyo abees weeye
Waabayda kula gaada
Waa dhurwaa u gaajaysan
Hilbahaaga gadistooda
Shalay gurigu kuu sahanshay
Markaad geedigii keento
Adigoonon loxos goynin
Ninka dhaha ka guur weeye
Gacal oosha wada yaala
Garo oo ul iyo diirra
Guunyadu u wada daaqdo
Abidkoodna kala guurin
Ninka balo ka gada weeye
Kala geeya meel baasta
Waa shilin gabaareey ah
Gafaniyo qaniin weeye
Jirjiroole gadihiisa
Ammintiiba midab gaara
Iyo goorta uu joogo
Isu dhiga geddiis weeye.
Gaaliyo dirkeed maaha
Muslinkana la gedo maaha
Halkaad guul ka filanayso
Isagaa gufaynaaya
Goldoloolo aad leeday
Isagaa ka dhiga guulo
Gobonimo u dirirkeeda
Gacan waligi muu qaadin
Erey qudhana muu gaysan
Misna geesi diran weeye
Eraygaasi googaaa dheh
Gudbi Maxamed suugaanta
Gaadhsii Bahweynteena
Iyo goboladii oo dhan
Waa goob la muuneeyey
Googoosyo lagu daahay
Baallaydu gabigeedba
Gole weeye ay joogto
Tukaa gees u yara baydhay
Intuu gaar isula shawray
Wuxuu talo ku gawsiiyay
Tashi gubayey laabtiisa
Inuu maanta gole keeno
Gogoshii ku soo laabay
Kuye guurtidaay heedhe
Codsibaan gudbinayaaye
Yaan laygu gacan saydhin
Shimbiraha gadaydaas ah
Inta iga gu hoosaysa
Dhirta midhaha guud saran
Gacalkayoow ha loo daayo
Gobolada kale haadda
Intaan gaban u noqonaayo
Hilbaa gaar ha loo siiyo
Lagu garay tukii xeesha
Iyo laba gar daaqlaynta
Lagu yidhi guddoon weeye
Hawraarsan lagu goosay
Isna libin ku geeraarka
Madashii ku goobaysay
Gabay iyo ka tiri heeso
Biyo gororka maahmaahda
Adiguna Garaadkaaga
Rag hadduu is garan waayo
Ama Guurti kala saarta
Gayigaba ka soo waayo
Marag kii u gali la iyo
Garsoorkii u niqi laana
yahay ruuxa gashiyaysan
Gafka uu tirsanayaana
Cidi ugu Garaabaynin
Garawshiiyo ku helaynin
Iyo Daw Cid Garansiisa
Godobtiisa inu doonto
Sow lama gafaan maaha
Godku halaqu kaa saydhay
Inaad maanta garan weydo
Markalana lagaa goosto
Sow ganac jabkaa maaha
Jidkii Bahalka kuu geeyay
Iyo Goosha iyo aarka
Markuu guule kaa saaray
Dib u dheelmad galabtiiya
Inuu goobti kula aado
Sow garasho xumi maaha
Aniguna gobtaay heedhe
Waan sii galbinayaaye
Go’aan adigu aad leeday
Nin garoocda ha u dhiibin
Mid Hangaaban uga dhaaro
Adna geesigaad boqorto
Gol qaniinis haku maalin
Guja nacasta ka ilaali
Maalmaha is guristooda
Gedmashada ka dhawr adigu
No comments:
Post a Comment